Սառնարանը չի սառեցնում. 7 պատճառ և ինչ անել հենց հիմա

Առավոտյան բացում եք սառնարանը, իսկ կաթը գոլ է, կարագը՝ փափկած։ Լույսը վառվում է, ինչ-որ ձայն էլ կա, բայց ցուրտ չկա։ Մի՛ շտապեք մտածել, որ սառնարանը «գնաց»։ Դեպքերի մոտ կեսում խնդիրը մանր բան է, որը կա՛մ ինքներդ կլուծեք, կա՛մ վարպետը՝ մեկ այցով։

Եկեք գնանք հերթով՝ պարզից դեպի բարդը։

Նախ ստուգեք այս 5 բանը (5 րոպե է տևում)

1. Հոսանքը և վարդակը։ Ծիծաղելի է հնչում, բայց լինում է։ Եթե ներսի լույսը չի վառվում, միացրեք նույն վարդակին ուրիշ սարք, օրինակ՝ հեռախոսի լիցքավորիչ։ Հոսանքի անջատումներից հետո երբեմն ավտոմատն է գցած լինում։

2. Ջերմաստիճանի կարգավորիչը։ Երեխան պտտել է, մթերք դնելիս ձեռքով կպել եք, և կարգավորիչը կանգնած է 0-ի կամ 1-ի վրա։ Դրեք միջին դիրքի (սովորաբար 3–4), իսկ էլեկտրոնային վահանակով մոդելներում՝ +4°C սառնարանի և −18°C սառցախցիկի համար։

3. Դռան ռետինը։ Փակեք դուռը՝ մեջտեղում թղթի թերթ պահելով։ Եթե թերթը հեշտ դուրս է գալիս, ռետինը չի կպնում, և տաք օդը ամբողջ օրը ներս է մտնում։ Սառնարանը աշխատում է առանց կանգ առնելու, բայց չի հասցնում սառեցնել։

4. Ինչքան է լցված։ Եթե ներսը խցանված է, կաթսան էլ տաք եք դրել, օդը չի շրջանառվում։ No Frost մոդելներում հատկապես մի՛ փակեք հետևի պատի օդանցքները տուփերով։

5. Հետևի հատվածը։ Սառնարանը պատից պետք է հեռու լինի գոնե 5–7 սմ։ Հետևի ցանցը (կոնդենսատորը) տարիների փոշով ծածկված լինելու դեպքում ջերմությունը չի հեռանում։ Անջատեք հոսանքից և փոշեկուլով մաքրեք։

Եթե այս ամենը կարգին է, իսկ սառնարանը էլի չի սառեցնում, խնդիրն արդեն տեխնիկական է։

Պատճառներ, որոնց համար վարպետ է պետք

Ֆրեոնի արտահոսք

Ամենատարածված պատճառներից է։ Նշանները՝ մոտորը աշխատում է գրեթե անընդհատ, հետևի ցանցը սառն է (պետք է տաք լինի), ներսում մի քիչ ցուրտ կա, բայց ոչ բավարար։ Կարևոր է իմանալ՝ ֆրեոնը ինքն իրեն «չի վերջանում»։ Եթե պակասել է, ուրեմն ինչ-որ տեղից արտահոսում է։ Պարզապես լիցքավորելը անիմաստ է. մեկ-երկու ամսից նույն վիճակն է լինելու։ Ճիշտ աշխատանքը՝ գտնել արտահոսքի տեղը, փակել, վակուում անել, հետո միայն լիցքավորել։

Կոմպրեսորի (մոտորի) կամ գործարկման ռելեի խնդիր

Լսվում է «չրթ», մի քանի վայրկյան բզզոց, էլի «չրթ», և լռություն։ Սա սովորաբար գործարկման ռելեն է (էժան դետալ է) կամ, ավելի վատ դեպքում, հենց կոմպրեսորը։ Տարբերությունը միայն չափումով է պարզվում։

Թերմոստատ կամ ջերմաստիճանի տվիչ

Սառնարանը «չի հասկանում», որ ներսում տաք է, և չի միացնում մոտորը։ Կամ հակառակը՝ շուտ է անջատում։

Օդափոխիչը (No Frost մոդելներում)

Սառցախցիկը սառեցնում է, իսկ վերևի բաժինը՝ ոչ։ Հաճախ օդափոխիչն է կանգնել կամ սառույցի մեջ է մնացել։ Այս թեմայի մասին առանձին գրել ենք՝ No Frost սառնարանը սառույց է կապում։

Կառավարման պլատա

Լարման տատանումներից հետո էլեկտրոնային մոդելներում պլատան է վնասվում։ Շատ դեպքերում այն վերանորոգվում է, պարտադիր չէ նորը գնել։

Ինչ ՉԱՆԵԼ

• Սառույցը դանակով կամ պտուտակահանով մի՛ քերեք։ Մեկ անզգույշ շարժում, և գոլորշիչը ծակվում է. դա արդեն թանկ վերանորոգում է։
• Մի՛ միացրեք-անջատեք իրար հետևից։ Անջատելուց հետո սպասեք գոնե 10 րոպե։
• Եթե մոտորը տաքանում է ու չի սառեցնում, մի՛ թողեք օրերով աշխատի։ Այդպես կոմպրեսորը վերջնական այրվում է։

Իսկ մթերքը՞

Փակ դռնով սառցախցիկը ցուրտը պահում է մոտ 12–24 ժամ, սառնարանի բաժինը՝ 4–6 ժամ։ Դուռը հնարավորինս քիչ բացեք և վարպետին զանգեք նույն օրը։

Հաճախ տրվող հարցեր

Հին սառնարանը արժե՞ վերանորոգել։
Եթե խնդիրը ռելեն, թերմոստատը, ռետինը կամ օդափոխիչն է՝ հաստատ արժե։ Եթե կոմպրեսորն է այրվել 15 տարեկան սառնարանում, նստեք հաշվեք։ Այս մասին մանրամասն՝ վերանորոգե՞լ, թե՞ նորը գնել։

Վերանորոգումը տա՞նն է արվում։
Այո, գրեթե միշտ։ Սառնարանը տեղափոխելու կարիք չկա։

Ինչքա՞ն կարժենա։
Կախված է պատճառից։ Վարպետը նախ ախտորոշում է, գինն ասում է տեղում, և աշխատանքը սկսում է միայն ձեր համաձայնությունից հետո։ Մոտավոր գները կարող եք տեսնել Գներ էջում։