Լվացքի մեքենան ջուրը չի քաշում (չի դատարկում). ինչ անել

Մեքենան կանգնել է ծրագրի կեսին։ Թմբուկում ջուր է, շորերը՝ թաց-թաց, դուռը չի բացվում, էկրանին՝ ինչ-որ կոդ (Samsung-ում 5E կամ 5C, LG-ում OE, Bosch-ում E18, Indesit-ում F05)։ Ծանո՞թ է։

Հանգիստ։ Սա լվացքի մեքենաների ամենատարածված խնդիրն է, և շատ դեպքերում պատճառը ձեր գրպանում մոռացված մանրադրամն է կամ երեխայի գուլպան։

Քայլ 1. Հանեք ջուրը և բացեք դուռը

1. Անջատեք մեքենան հոսանքից։ Պարտադիր։
2. Մեքենայի առջևում, ներքևի աջ անկյունում փոքրիկ դռնակ կա։ Բացեք։
3. Ներսում կտեսնեք մեծ կլոր խցան (ֆիլտրը) և շատ մոդելներում՝ բարակ խողովակ՝ փոքր խցանով։ Դա վթարային դատարկման խողովակն է։
4. Դրեք ցածր տարա (ջեռոցի թավան լավ է տեղավորվում), հանեք խողովակի խցանը և թողեք ջուրը հոսի։ Պատրաստ եղեք՝ մի քանի անգամ տարան դատարկելու եք, ջուրը 10–15 լիտր է։
5. Եթե խողովակ չկա, հատակին սրբիչներ փռեք և ֆիլտրը դանդաղ, քիչ-քիչ թուլացրեք ժամացույցի սլաքի հակառակ ուղղությամբ։

Ջուրը դատարկվելուց մի քանի րոպե անց դռան կողպեքը կբացվի։

Քայլ 2. Մաքրեք ֆիլտրը

Ֆիլտրը ամբողջությամբ հանեք։ Չզարմանաք, եթե այնտեղ գտնեք մանրադրամ, մազակալ, կոճակ, կրծկալի մետաղալար, թաշկինակի մնացորդներ։ Լվացեք ծորակի տակ, ձեռքով ստուգեք նաև անցքի ներսը. խորքում պոմպի թիակն է, այն պետք է ազատ պտտվի։

Ֆիլտրը տեղը դրեք և ամուր ձգեք, թե չէ հաջորդ լվացքին ջուրը հատակին կլինի։

Քայլ 3. Ստուգեք խողովակը և կոյուղին

• Հետևի մոխրագույն ծալքավոր խողովակը ծալված կամ մեքենայի տակ սեղմված չէ՞։
• Խողովակը հանեք կոյուղու միացումից և փչեք. օդը պիտի ազատ անցնի։
• Եթե լվացարանի ջուրն էլ է դանդաղ գնում, խնդիրը ոչ թե մեքենան է, այլ սիֆոնը կամ կոյուղին։

Հիմա միացրեք «Քամել» կամ «Ջրի դատարկում» ծրագիրը։ Եթե ջուրը գնաց, խնդիրը լուծված է։

Եթե չօգնեց. ինչ կարող է լինել

Պոմպը։ Լսվում է բզզոց, բայց ջուրը չի շարժվում, կամ լռություն է։ Պոմպը կա՛մ այրվել է, կա՛մ թիակը պոկվել է, կա՛մ մեջը թել ու մազ է փաթաթվել։ Ամենահաճախ փոխվող դետալներից է, աշխատանքը տևում է մոտ 30–40 րոպե։

Բաքից դեպի պոմպ գնացող ներքին խողովակը։ Գուլպան կամ մանկական շորը հասնում է այնտեղ, ուր դուք չեք հասնի առանց մեքենան բացելու։

Ջրի մակարդակի տվիչը (պրեսոստատ)։ Մեքենան «կարծում է», որ ջուրն արդեն դատարկված է, և կանգ է առնում։

Կառավարման պլատան։ Պոմպը սարքին է, բայց նրան հրաման չի հասնում։

Ինչ չանել

• Դուռը ուժով մի՛ բացեք։ Կողպեքն ու բռնակը կկոտրեք, և մեկ խնդրի փոխարեն կունենաք երկուսը։
• Ծրագիրը 5 անգամ իրար հետևից մի՛ վերագործարկեք։ Խցանված վիճակում աշխատող պոմպը այրվում է։

Որ այլևս չկրկնվի

• Լվանալուց առաջ գրպանները ստուգեք։
• Գուլպաները, մանկական շորերը, կրծկալները լվացեք ցանցե տոպրակով։
• Ֆիլտրը մաքրեք 2–3 ամիսը մեկ։ Իսկ եթե տանը կենդանի կա՝ ամեն ամիս։